'a spazzatura

Doppo c'haggio pavato 'a spazzatura
so'ghiuto a prutesta ncopp''a Quistura
e haggio alluccato - Chesta è na schifezza...
cchiù pavo 'a tassa e cchiù sto' 'int''a munnezza!

'A 'int'a na stanza è asciuto nu signore
c'ha ditto - Dite a me... sono il Questore.
- Ah! Proprio a vuie cercavo, - Ce haggio ditto,
- Spiegateme nu poco... addò sta scritto

ca i', quanno scengo, haggia scanzà buatte,
scorze 'e mellune, carte, buste 'e latte.
E nun ve dico 'e ssette, pure 'e nnove
sta 'o marciapiede chino 'e scorze d'ove!

Chello ca cchiù me sposta 'a nervatura
è o fatto c'haggia fa chesta figura
d'essere ditto ca so' nu fetente
pure si pavo sempe, puntualmente.

Chest'è 'a cartella, si nun me credite,
e si pavammo... avimm''a sta pulite!
M'ha risposto 'o Quistore - C'è una legge
che nel mercato il cittadin protegge.

Se voi pagate per un pantalone
ne diventate subito il padrone!
P''a spazzatura?... E' chesta ccà 'a risposta:
L' 'ate pavata?... E è tutta roba vosta!